Perl oder Pica (Roman)

Dësen Artikel beschäftegt sech mat dem Jhemp Hoscheit sengem Roman. Fir d'Verfilmung mam selwechten Titel, kuckt wgl. Perl oder Pica (Film).

Perl oder Pica
Buchstyp	Roman
Auteur	Jhemp Hoscheit
Ursprongsland	Lëtzebuerg
Erauskomm	1998
Verlag	Éditions Schortgen
Sprooch	Lëtzebuergesch

Perl oder Pica ass den Numm vun engem Roman vum Jhemp Hoscheit, deen 1998 bei den Editions Schortgen erauskoum. Et ass dem Hoscheit säin éischte Roman.

Ëm wat geet et?

1963 zu Esch-Uelzecht: den Norbert "Norbi" Welscheit ass e Jong vun 12 Joer. Hie geet an d'6. Schouljoer an ass an de Massendénger; säi Papp verkeeft Bicher a reliéis Paraphernalien. Erzielt ginn dem Norbi seng Alldagserliefnesser mat Famill, Kolleegen a Matschüler, mat am Hannergrond dem Kale Krich, engem verdrängten Zweete Weltkrich, an deene sëllegen aneren Tabuen, déi engem virwëtzegen a fantasiebegabte Bouf d'Liewe schwéier gemaach hunn...

Soss

Den Titel bezitt sech op zwou Schrëftaarte vu Schreifmaschinnen, tëschent deenen ee sech decidéiere muss.

2006 koum dem Pol Cruchten seng Verfilmung vum Buch ënner dem selwechten Titel an d'Kinoen.

Auszeechnungen

Perl oder Pica gouf mam 3. Präis vum Concours littéraire national 1997 (Theema: Romaner) gradewéi mam Prix Servais 1999 ausgezeechent.

Rezensiounen

• D'Nathalie Jacoby schreift am Lëtzebuerger Land:

"... dem Jhemp Hoscheit säi Buch liest sech mat der Authentizitéit an der Wouerecht vun enger Biographie, mat der Ironie an dem Aenzwénkeren och vun deem, dee gläichzäiteg Verständnis an Distanz huet. (...) Niewt deem, wat de Norbi erliewt, as dëst och d'Geschicht vun de 60er Joëren zu Lëtzebuerg, enger Zäit, déi nach op esou munch Explikatioun waart."

Bibliographie

• Jhemp Hoscheit: Perl oder Pica, Roman. Éditions Schortgen, Esch-Uelzecht, November 1998. ISBN 2-87953-527. Eng gutt hallef Dosen Neioploen.

Um Spaweck

• Fiche op autorenlexikon.lu.
• Perl oder Pica bei editions-schortgen.lu.
• Jean-Michel Treinen: "Wéi schreiwt een dat wichtegst Buch vum Joer?." In: d'Lëtzebuerger Land, 46. Jg., nº 29 (16.07.1999), p. 19 [Numérisé par la Bibliothèque nationale du Luxembourg]. Interview.